ଏଣ୍ଡ୍ରଏଡର ସଂସ୍କରଣଗୁଡ଼ିକ ସମୟ ସହ ପରିଵର୍ତ୍ତିତ ହୁଏ l ନୂତନ ସଂସ୍କରଣଗୁଡ଼ିକୁ ଇଂରାଜୀ ଵର୍ଣ୍ଣମାଳା କ୍ରମାଙ୍କରେ ପଡ଼ୁଥିବା କୌଣସି ମିଠାଦ୍ରଵ୍ୟ ନାମରେ ନାମିତ କରାଯାଏ । ଗତ ଵର୍ଷ ଏଣ୍ଡ୍ରଏଡ଼ ‘ଓ‘ ପାଇଁ ‘ଓରୀଓ’ ନାମକୁ ଚୟନ କରାଯାଇଥିଲା ଆଉ ଏଵେ ‘ଏଣ୍ଡ୍ରଏଡ ପି‘ ପାଇଁ ନାମ ବଛାଚାଲିଛି । ୨୦୧୮ ଅଗଷ୍ଟ କିଂଵା ସେପ୍ଟେମ୍ବର ଵେଳକୁ ଏହାର ନଵମ ସଂସ୍କରଣ ‘ଏଣ୍ଡ୍ରଏଡ ପି‘ ଏକ ମିଠାଦ୍ରଵ୍ୟ ନାମରେ ନାମିତ ହୋଇଯିବ ; ତା’ପରେ ‘କ଼୍ୟୁ‘ ଏବଂ ପରେ ‘ଆର‘ ପାଳି ପଡ଼ିବ । ଏକାଦଶ ସଂସ୍କରଣ ‘ଏଣ୍ଡ୍ରଏଡ ଆର‘ ୨୦୨୦ ଅଗଷ୍ଟ ଵେଳକୁ ଆସିଯିବାର ଅନୁମାନ କରାଯାଉଛି ଯାହା ‘ଏଣ୍ଡ୍ରଏଡ କ୍ୟୁ‘ ଉନ୍ମୋଚନ ପରେ ଆଲୋଚନା ପରିସରକୁ ଆସିବ । ସେତେଵେଳେ ଆରମ୍ଭ ହୋଇଯିବ ନାମ ଚୟନ ଲବି । ଭାରତର କୋଣ ଅନୁକୋଣରୁ ଵିଭିନ୍ନ ନାମ ସବୁ ମତାମତ ଯୋଗେ ଗୂଗୁଲ ମୁଖ୍ୟାଳୟରେ ପହଞ୍ଚିବ । ସେଥିରୁ ଗୋଟିଏ ନାମ ଚୟନ ହେବ । ଆଵଶ୍ୟକ ସ୍ଥଳେ ଗୂଗୁଲ ତାଙ୍କ ଓପିନିୟନ ରିୱାର୍ଡ ଆପରେ କେତୋଟି ପ୍ରମୁଖ ନାମଗୁଡ଼ିକୁ ନେଇ ଜନସାଧାରଣଙ୍କ ମତଦାନ ଲୋଡ଼ିବେ, ଯେପରି ‘ଏଣ୍ଡ୍ରଏଡ ଏନ‘ ପାଇଁ ନ୍ୟୁଟେଲା, ନେପୋଲିଅନ, ନୌଗତ ଓ ନୂରି ଆଦି ନାମଗୁଡ଼ିକ ମଧ୍ୟରୁ ‘ନୌଗତ‘ ଚୟନ ହୋଇଥିଲା । ଵିଗତ ୧୦ ଵର୍ଷର ଇତିହାସ ମଧ୍ୟରେ, ପ୍ଲେ ଷ୍ଟୋରରୁ ଆପ ଡାଉନଲୋଡ଼ କରିବାରେ ଭାରତୀୟ ଗ୍ରାହକ ଅଗ୍ରଣୀ ଥିବା ସତ୍ତ୍ୱେ ଗୂଗୁଲ କୌଣସି ଭାରତୀୟ ମିଠାଦ୍ରଵ୍ୟ ନାମରେ ଏଣ୍ଡ୍ରଏଡ ସଂସ୍କରଣକୁ ନାମିତ କରିନାହାନ୍ତି । ବଢ଼ୁଥିବା ଵ୍ୟଵସାୟକୁ ଦୃଷ୍ଟିରେ ରଖି ଗୂଗୁଲ ଭାରତର କୋଟି କୋଟି ଗୂଗଲ ଗ୍ରାହକଙ୍କ ଆହୁରି ଆପଣାର ହେବାପାଇଁ ଭାରତର ଅତି ପରିଚିତ ମିଠାଦ୍ରଵ୍ୟ ରସଗୋଲାକୁ ନେଇ ‘ଆର‘ ସଂସ୍କରଣର ନାମକରଣ କରିବା ନିଶ୍ଚିତ ଭାଵରେ ଉପଯୁକ୍ତ ପଦକ୍ଷେପ ହେବ । ଭାରତ ଓ ଵିଦେଶରେ ଅତି ପ୍ରିୟ ଆମର ରସଗୋଲା ଏହି ନାମକରଣ ପାଇଁ ସର୍ଵୋତ୍ତମ ହେବ । ଏହା ଭାରତ ମିଠାର ପ୍ରତିନିଧିତ୍ୱ କରେ କହିଲେ ଅତ୍ୟୁକ୍ତି ହେବନାହିଁ । ନାମଟି ସୁନ୍ଦର ଓ ଛୋଟ ଯେମିତି ରସଯୁକ୍ତ ଓ ମିଠା ସେମିତି । ଏଣୁ ଗୂଗୁଲ ଆମ ଅନୁରୋଧ ନିଶ୍ଚୟ ରକ୍ଷା କରିବେ ବୋଲି କୁହନ୍ତି ‘ଅଖଣ୍ଡ ଓଡ଼ିଶା‘ ସଂଗଠନର ଆଵାହକ ଡାକ୍ତର ଦେଵାଶିଷ ଜ୍ୟୈଷ୍ଠୀ । ଏଣ୍ଡ୍ରଏଡକୁ ଆହୁରି ସ୍ୱାଦିଷ୍ଟ, ମଧୁମୟ ଓ ଦେଶୀୟ କରିବା ପାଇଁ ଏଵେଠୁ ଲବି ଆରମ୍ଭ ହୋଇଯିବା ଆଵଶ୍ୟକ ବୋଲି ଡା. ଜ୍ୟୈଷ୍ଠୀ ଆହ୍ୱାନ ଦେଇଛନ୍ତି । ଡାକ୍ତର ଜ୍ୟୈଷ୍ଠୀଙ୍କ ସହ ଭୁଵନେଶ୍ୱର ବଜର କଥୋପକଥନ:
ଭୁ.ବ. : କାହିଁକି ଏ ‘ଏଣ୍ଡ୍ରଏଡ – ରସଗୋଲା‘ ଅଭିଯାନ ?
ଡା.ଜ୍ୟୈଷ୍ଠୀ: ମିଠାଦ୍ରଵ୍ୟମାନଙ୍କ ମଧ୍ୟରେ ଆଗ ଧାଡ଼ିର ମିଠା ଭାବେ ପରିଗଣିତ ଏବଂ ସମଗ୍ର ଭାରତର ଖାଦ୍ୟ ସଂସ୍କୃତିରେ ବହୁଳ ଭାବେ ପ୍ରଚଳିତ । ଏହାର ସ୍ୱତ୍ୱ ଦାବି କରିବାପାଇଁ ଭାରତର ଦୁଇ ରାଜ୍ୟ ମଧ୍ୟରେ ବିବାଦ ଲାଗିରହିଛି । ପର୍ତ୍ତୁଗୀଜମାନେ ମଧ୍ୟ ଏହାର ଉଦ୍ଭାବନ ଦାବି କରୁଛନ୍ତି । ଏଣୁ ମିଠାଦ୍ରଵ୍ୟ ଭିତରେ ଏହାର ମର୍ଯ୍ୟଦା ଅନୁମେୟ । ଓଡ଼ିଶାରେ ୬୦୦ରୁ ଅଧିକ ଵର୍ଷ ଧରି ପ୍ରଚଳନ ହେବାର ଇତିହାସ ରହିଛି । ଆନ୍ତର୍ଜାତିକ ସ୍ତରରେ ଏହାର ପରିଚୟ ଵୃଦ୍ଧି ପାଇଲେ ଆମର ସ୍ୱାଭିମାନ ବଢ଼ିବ ।
ଭୁ.ବ.: କେମିତି ଏହା ସଫଳ ହେବ ବୋଲି ଭାବୁଛନ୍ତି ?
ଡା.ଜ୍ୟୈଷ୍ଠୀ: ଭାରତର ମିଠାକୁ ଏଣ୍ଡ୍ରଏଡ ସଂସ୍କରଣର ନାମ ଦେବାକୁ ଦୀର୍ଘ ୫ ଵର୍ଷ ହେବ ଅଭିଯାନ ଚାଲିଆସୁଛି । ‘ଏଣ୍ଡ୍ରଏଡ କେ‘ରୁ ଆରମ୍ଭ କରି ଏନ ପର୍ଯ୍ୟନ୍ତ ଭାରତୀୟମାନେ ଵିଭିନ୍ନ ଆଞ୍ଚଳିକ ମିଠାଦ୍ରଵ୍ୟର ନାମ ପ୍ରସ୍ତାଵ ଦେଇ ଅନଲାଇନ କ୍ୟାମ୍ପେନ ଚଳାଇଆସୁଛନ୍ତି । ଯଦିଓ ଏଯାଏଁ ଭାରତୀୟମାନେ ସଫଳ ହୋଇନାହାଁନ୍ତି, ଏହି ଶୁଭଯୋଗ କେଵଳ ରସଗୋଲା ଭାଗ୍ୟରେ ଅଛି ବୋଲି ଅନୁମାନ କରାଯାଉଛି ।
ଭୁ.ବ.: ଆଗକୁ ଦୁଇ ଵର୍ଷ ସମୟ ଅଛି ତେବେ ଏତେ ଶୀଘ୍ର କାହିଁକି ?
ଡା ଜ୍ୟୈଷ୍ଠୀ: ଏଣ୍ଡ୍ରଏଡର ଵର୍ଷକୁ ଗୋଟିଏ ସଂସ୍କରଣ ବାହାରୁଥିବା ଵେଳେ ୨୦୨୦ ଅଗଷ୍ଟ ଵେଳକୁ ୧୧ତମ ସଂସ୍କରଣ ଉନ୍ମୋଚନ ହେବାର ଆଶା କରାଯାଉଛି । ଏହି ନାମକରଣ ଲବି ୨୦୧୯ ସେପ୍ଟେମ୍ବରରୁ ଆରମ୍ଭ ହୋଇଯିବ । ଏଵେଠୁ ମୂଳଦୂଆ ପଡ଼ିଥିଲେ ଆର ଵର୍ଷ ପାଇଁ ସମଗ୍ର ଭାରତର ଜନମତ ଆମ ସପକ୍ଷରେ ଆଣିପାରିବୁ ବୋଲି ଆଶାବାଦୀ । ବଙ୍ଗୀୟମାନେ ଏଥିରେ ସହଯୋଗ ଦେଲେ ଆମ ପାଇଁ ପ୍ଲସ ପଏଣ୍ଟ ହେବ । ୨୦୧୮ ରସଗୋଲା ଦିଵସରୁ ଆମେ ଅନଲାଇନ କ୍ୟାମ୍ପେନର ଶୁଭାରମ୍ଭ କରୁଛୁ ।
ଭୁ.ବ: ଏଇ ଅଭିଯାନର ରୂପରେଖ କ‘ଣ?
ଡା.ଜ୍ୟୈଷ୍ଠୀ: ଅତି ଶୀଘ୍ର change.orgରେ ଏକ ଅନଲାଇନ ପିଟିସନ ଚଳାଇବାର ଯୋଜନା ରଖିଛୁ । ତା ଵ୍ୟତୀତ ସମୟ ଆସିଲେ ଵ୍ୟକ୍ତିଗତ ସ୍ତରରେ ଗୂଗୁଲକୁ ସାମୁହିକ ଅନୁରୋଧ କରାଯିବା ପାଇଁ ସମସ୍ତଙ୍କୁ ନିବେଦନ କରିବୁ । ଯେଉଁମାନେ ଏଣ୍ଡ୍ରଏଡ ମୋବାଇଲ ଧରୁଛନ୍ତି କିଂଵା ଗୁଗୁଲର ଜିମେଲ ଵ୍ୟଵହାର କରୁଛନ୍ତି, ସେଟିଂକୁ ଯାଇ ବିନା ଖର୍ଚ୍ଚରେ ଗୂଗୁଲକୁ ଏ’ ବାବଦରେ ମତାମତ ଦେଇହେବ । ଏହା ସହ ଆମ ଉତ୍ସାହୀ ସଂଗଠନ ‘ଅଖଣ୍ଡ ଓଡ଼ିଶା‘ ଗୂଗୁଲ ମୁଖ୍ୟାଳୟକୁ ପାହାଳ ରସଗୋଲା ଭେଟି ଦେବାପାଇଁ ଚିନ୍ତା କରୁଛି ।
——————————————————————————————————————–
By
Nistha Ranjan Dash
@DashNistha on twitter
Find more like this. Search using : #OdiaPost